ააფ

რა მოაქვს თამაშის ახალ წესებს სახელმწიფო დაზღვევის სფეროში

დაზღვევის სფეროში სიტუაცია რთულდება. ყოველ შემთხვევაში, თვეების წინ გაკეთებული ნეგატიური პროგნოზები რეალობა ხდება. სადაზღვევო ბაზარზე კერძო სადაზღვევო კომპანიები ნელ-ნელა წილს თმობენ და სულ უფრო მეტი ადამიანის მომსახურება სახელმწიფოს რჩება. პარალელურად, დაზღვეულთაგან სულ უფრო ხშირად ისმის პრეტენზიები, რომ სამედიცინო მომსახურების ხარისხი კლებულობს, პრობლემები ექმნებათ ამა თუ იმ კლინიკაში კუთვნილი სამედიცინო პროცედურების ჩატარებისას, თუმცა მთავრობაში მაინც იმეორებენ, რომ ყველაფერი კონტროლის ქვეშაა და სიტუაციაც არ არის საგანგაშო.

რა და როგორ იყო ახალი ხელისუფლების მოსვლამდე

რაც ხელისუფლებაში „ქართული ოცნება“ მოვიდა, ჯანმრთელობის დაცვის სამინისტრომ პოლიტიკა შეცვალა და „საყოველთაო დაზღვევის“ მიზნით თამაშის ახალი წესები შემოიღო. ჯერ კიდევ არჩევნებამდე, „ქართული ოცნება“ ამომრჩეველს ჰპირდებოდა, რომ ხელისუფლებაში მოსვლის შემდეგ ქვეყანაში დაუზღვეველი ადამიანი აღარ დარჩებოდა და ყველას ჯანმრთელობაზე სახელმწიფო იზრუნებდა. პრინციპში, სამედიცინო მომსახურებას ჯანმრთელობის დაზღვევის კუთხით წინა ხელისუფლებაც სახელმწიფოს ხარჯზე ახდენდა, თუმცა, მაშინ დაზღვევა და სახელმწიფოს მხრიდან მომსახურების ხარჯების დაფარვა მხოლოდ მოსახლეობის გარკვეულ კატეგორიებს ეხებოდა. მათ შორის იყვნენ სოციალურად დაუცველები, ვისაც მაშინდელმა სოციალური დაცვის სააგენტომ 70 000 ქულაზე ნაკლები სარეიტინგო ქულა მიანიჭა, პედაგოგები, ძალოვანი უწყებების თანამშრომლები.
2012 წლის სექტემბრიდან, სანამ „ნაციონალური მოძრაობა“ ისევ ხელისუფლებაში იყო, სახელმწიფო დაზღვევის არეალი კიდევ უფრო გაფართოვდა და პროგრამა კიდევ უფრო მეტ კატეგორიაზე გავრცელდა.
უფასო სადაზღვევო პოლისით სარგებლობა შესაძლებელი გახდა 0-დან 5 წლის ასაკის ჩათვლით ბავშვებისთვის, სტუდენტებისთვის, საპენსიო ასაკის მოსახლეობისთვის, შეზღუდული შესაძლებლობის მქონე ბავშვებისთვის და მკვეთრად გამოხატული შეზღუდული შესაძლებლობის მქონე პირებისთვის.

იმავე დროს იყო „ნაციონალების“ მხრიდან იყო დაპირება, რომ სახელმწიფო დაზღვეულთა რაოდენობას მნიშვნელოვნად გაზრდიდა და ქვეყანაში ყოველი მეორე ადამიანი სამედიცინო დაზღვევის მფლობელი გახდებოდა. თუმცა, „ქართულმა ოცნებამ“ უფრო გულუხვი დაპირება გასცა და სახელმწიფოს ხარჯზე ყველა დაუზღვეველი მოქალაქის დაზღვევის პირობა დადო.

პრობლემების დასაწყისი

დაზღვევის სფეროს მიმართ პრეტენზიები ხშირად ისმოდა წინა ხელისუფლების დროსაც. სადაზღვევო კომპანიებს არც თუ იშვიათად „ფულის იოლი შოვნის“ გამო აკრიტიკებდნენ. კრიტიკის გამწვავებას განსაკუთრებით იწვევდა სახელმწიფო დაზღვევის მქონეებისთვის მომსახურების შეფერხება ან საერთოდ მომსახურების არ გაწევა. 2011 წლის დასაწყისში კონტროლის პალატამ სადაზღვევო კომპანიები სახელმწიფო ფულის მითვისებაშიც დაადანაშაულა და ხმაურიანი სკანდალიც ატყდა (ამ საკითხის შესახებ იხ. „ააფი“ #2(134), 2011 წ.). როგორც კონტროლის პალატის მაშინდელი მონაცემებით გაირკვა, სადაზღვევო კომპანიებმა 2008-2010 წლებში სახელმწიფოსგან ჯამში 284 080 895 ლარი მოიზიდეს და აქედან დაზღვეულების სამედიცინო მომსახურებაზე მხოლოდ 114 335 309 ლარი დახარჯეს. დაუხარჯავმა თანხამ კი 169 745 586 ლარი შეადგინა, რაც მთლიანად მოზიდული თანხის თითქმის 60%-ს უტოლდებოდა. სწორედ, მაშინდელი ამბების შემდეგ სახელმწიფომ შეცვალა სახელმწიფო დაზღვევის პოლიტიკა და გადაწყვიტა თითო დაზღვეულზე ჯამური პრემია მაქსიმალურად შეემცირებინა. სადაზღვევო კომპანიებსაც კონკურენცია მაქსიმალურად დაბალი ფასის შეთავაზებით მოუწიათ. ამის პარალელურად სადაზღვევო კომპანიებს რეგიონებში ახალი კლინიკების აშენების პირობებიც ჩაუდეს. საბოლოო ჯამში, სადაზღვევო კომპანიებმა კლინიკების მშენებლობაც დაიწყეს და მაქსიმალურად დაბალი ფასიც შესთავაზეს სახელმწიფოს, რა ფასადაც ისინი თითო დაზღვეულს მოემსახურებოდნენ. თავდაპირველი ტენდერი 2010 წლის აპრილში გაიმართა, რა დროსაც მომავალი 3 წლის მანძილზე სადაზღვევო კომპანიების და სახელმწიფოს ურთიერთობა უნდა განსაზღვრულიყო, თუმცა ეს ტენდერი მაშინდელმა ჯანდაცვის მინისტრმა ალექსანდრე კვიტაშვილმა გაუქმებულად გამოაცხადა. მთავრობაში განაცხადეს, რომ კომპანიები ერთმანეთთან შეთანხმებულად მოქმედებდნენ და რეალური კონკურენციის ნაცვლად ერთმანეთთან გარიგდნენ და ამა თუ იმ სეგმენტში კონკურენციით ფასის დაწევა აირიდეს. საბოლოოდ ტენდერი ხელახლა გაიმართა და სახელმწიფო დაზღვევის პროგრამაც გაგრძელდა. თუმცა, როგორც გაირკვა, პრობლემებმა თავი მაინც იჩინა.

დღევანდელი სიტუაცია

ახალი ხელისუფლების მოსვლის შემდეგ სადაზღვევო სფეროს მიმართ სახელმწიფოს დამოკიდებულება რადიკალურად შეიცვალა და ცნობილი გახდა, რომ დღევანდელი ხელისუფლება აპირებდა შევარდნაძისდროინდელი სქემის დაბრუნებას. საუბარია სახელმწიფო დაზღვევის ერთიანი ფონდის შემოღებაზე, რომელიც სახელმწიფო პროგრამებით დაზღვეულების სამედიცინო მომსახურებას უზრუნველყოფდა. ეს იდეა თავიდანვე ბევრმა გააკრიტიკა და ივარაუდა, რომ სიტუაცია ჩიხში შევიდოდა, რადგან კერძო სადაზღვევო კომპანიებს მნიშვნელოვანი თანხები მოაკლდებოდა – ეს კი მათ გაკოტრებას გამოიწვევდა. ასევე, სახელმწიფო სტრუქტურა ვერ შეძლებდა ეფექტიანად მოეხდინა თითქმის 4 მილიონიანი კონტინგენტის მომსახურება.

სოციალური დაზღვევის პროგრამა სახელმწიფომ დაიბრუნა და შესაბამისად, კერძო მოთამაშეებმა ბაზრის დიდი ნაწილი დაკარგეს და თამაშგარე მდგომარეობაში რჩებიან. თავი იჩინა გაწეული ხარჯების დაუბრუნებლობის თემამაც – ახალი კლინიკების მშენებლობა კერძო სადაზღვევო კომპანიებს გრძელვადიან გეგმებზე ჰქონდათ მორგებული და მოზიდული თანხებიც კერძო კლინიკებში გრძელვადიანი პერსპექტივის იმედად დააბანდეს. დღეს კი სადაზღვევო კომპანიებს ხარჯები ძველებურად აქვთ, შემოსავალი კი ახალმა სქემამ დააკარგვინა. ამიტომაც, კლინიკების მიმართ დავალიანება გაეზარდათ და დავალიანება მილიონებშია უკვე ასული. შესაბამისად, სადაზღვევო კომპანიებიც უკვე იძულებულები ხდებიან რამენაირად შეამცირონ ხარჯები...

როგორც გადაცემა „ბიზნესკურიერში“ საპატრიარქოს კლინიკის წარმომადგენლები აცხადებენ, მათი კლინიკის წინაშე სადაზღვევოების დავალიანებამ 600 ათას ლარს გადააჭარბა. ვახტანგ მეგრელიშვილის თქმით, ამ თანხით შეიძლებოდა ფარმაცევტული კომპანიების დავალიანების გასტუმრებაც და და კიდევ ახალი აპარატურის შეძენა. მისი თქმით, სადაზღვევო კომპანიებისგან ხდება პრაქტიკულად, კლინიკის დაშანტაჟება: „შენ შეიტანე განცხადება მედიაციის სამსახურში, შენ მიჩივლე სასამართლოში? - კარგი, მე აღარ გამოგიგზავნი პაციენტს“.

როგორც კლინიკაში აცხადებენ, პრობლემა სხვადასხვა კომპანიებთან აქვთ და თუ ვალის დაფარვაზე მოლაპარაკება ვერ შეძლეს, იძულებულები იქნებიან სასამართლოს მიმართონ.

ახალი სქემის პირველი მსხვერპლი – „ალფა“ სახელმწიფო პროგრამას ტოვებს

მას შემდეგ, რაც ბაზარზე ახალი თამაშის წესები შემოვიდა, სადაზღვევოებმა პრობლემები იგრძნეს. უკმაყოფილება მოხშირდა პაციენტებს შორისაც – ისინი სადაზღვევო კომპანიებსა და კლინიკებს შორის კომუნიკაციის პრობლემას ემსხვერპლნენ. რამდენად შემთხვევით ხდება მსგავსი სიტუაციები, ეს მედიაციის სამსახურმა უნდა გაარკვიოს, თუ უკმაყოფილო დაზღვეული ან სადაზღვევო სქემაში ჩართული რომელიმე მხარე მას მიმართავს. თუმცა, სანამ მტყუან-მართალი გაირკვევა, უკვე გამოჩნდა კომპანია, რომელიც ბაზრიდან გადის. არც მეტი, არც ნაკლები, ბაზრიდან გადის ერთ-ერთი ყველაზე სწრაფად მზარდი და ჯანმრთელობის დაზღვევაში უპირობო ლიდერი „ალფა“.

ფარმაცევტული კომპანია „ავერსის“ შვილობილი კომპანია „ალფა“, რომლის ირგვლივაც წინა წლებში დიდი მითქმა-მოთქმა იყო და რომელსაც კონკურენტი სადაზღვევო კომპანიები პრეტენზიებს უყენებდნენ – ახლა სახელმწიფო დაზღვევის პროგრამას ტოვებს და ამბობს, რომ დაფინანსება არასაკმარისია და ზარალს ვეღარ აუდის. არადა, „ალფაზე“ მოდიოდა სახელმწიფო პროგრამით დაზღვეული თითქმის მთელი თბილისის და გურიის რეგიონების მაცხოვრებლები. მთლიანად კი, ქვეყნის მასშტაბით დაახლოებით 300 000-მდე პაციენტს ემსახურებოდა.

ჯანდაცვის სამისნიტროში ამბობენ, რომ მიმდინარეობს გადაბარების პროცესი. პროცესის დასრულების შემდეგ კი ჯანდაცვის სამინისტრო დამატებით პირობებს გამოაცხადებს.

ლაშა ნიკოლაძე, ჯანდაცვის მინისტრის მრჩეველი: „ამჟამად მიმდინარეობს გადაბარების პროცესი, რომელიც გაგრძელდება 19 ივნისამდე.
დაზღვეულებისთვის 19 ივნისამდე მომსახურების რეჟიმი არ შეიცვლება. ამის შემდეგ, ჩვენ შევცვლით მომსახურების რეჟიმს და დამატებით შევატყობინებთ“.

ჯანდაცვის სამინისტროს ინფორმაციით, „ალფამ“ იმიტომ გადაწყვიტა ბაზრიდან გასვლა, რომ სახელმწიფოს მხრიდან მიღებული თანხა ვერ ანაზღაურებს ხარჯებს და ზარალზე მიდის. თუმცა, „ალფამ“ ორიოდე წლის წინ, როცა ბაზარზე შემოვიდა, იმდენად დაბალი ფასები შესთავაზა სახელმწიფოს, რომ კონკურენტი სადაზღვევო კომპანიები „ალფას“ დემპინგშიც კი ადანაშაულებდნენ. როგორც ჩანს, „ავერსის“ დაფუძნებული კომპანიის კონკურენტების მაშინდელი მოსაზრებები მთლად უსაფუძვლო არ იყო, თუმცა მაშინ „ავერსის“ დამფუძნებელი პაატა კურტანიძე ირწმუნებოდა, რომ „ალფა“ დემპინგს არ მიმართავდა და მოგებაც რჩებოდათ.

„არქიმედეს გლობალ ჯორჯიას“ გენერალური დირექტორი ნიკა რამიშვილი ამბობს, რომ 2010 წელს ტარიფების დაწევის ერთ-ერთი მთავარი მიზეზი სწორედ „ალფას“ შეთავაზებული ფასი გახდა.

„იმასაც აცხადებდა ხოლმე „ალფა“, რომ დაახლოებით 6 ლარად შეძლებდა დაზღვეულების მომსახურებას. ჩვენი დიდი ძალისხმევის შედეგად ჯამური პრემია 9 ლარზე ასწია, თუმცა, აღმოჩნდა, რომ ეგეც არ არის საკმარისი“.

კომენტარი გააკეთეს სადაზღვევო კომპანია „ალფას“ წარმომადგენლებმა. როგორც სადაზღვევო კომპანიის საზოგადოებასთან ურთიერთობის სამსახურის უფროსმა, ლალი ბრეგვაძემ განაცხადა, „ალფამ“ სახელმწიფო სადაზღვევო პროგრამა უკვე დატოვა, რაც დაბალი პრემიითა და მაღალი ზარალითაა განპირობებული.

„პრემია დაბალი და შეუსაბამო იყო. შესაბამისად, მოთხოვნილებასთან სადაზღვევო კომპანიის ზარალიანობა იყო მაღალი. აქედან გამომდინარე, „ალფა“ გამოვიდა სახელმწიფო სადაზღვევო პროგრამიდან. ჩვენ პირნათლად შევასრულეთ ის ვალდებულება, რაც ჩვენ გვეხებოდა ამ დრომდე. სადაზღვევო პროგრამიდან უკვე გამოსულები ვართ და სახელმწიფო სოციალური სააგენტო მოემსახურება ყველა იმ დაზღვეულს იგივე პირობებით, რომლითაც აქამდე „ალფას“ სახელმწიფო სადაზღვევო პროგრამით სარგებლობდა“, - განაცხადა ლალი ბრეგვაძემ.

აღსანიშნავია, რომ შრომის, ჯანმრთელობისა და სოციალური დაცვის მინისტრმა, დავით სერგეენკომ ჟურნალისტებს განუცხადა, რომ კომპანია „ალფამ“ პროგრამიდან გასვლის სურვილი თავად გამოთქვა და შესაბამისად შედგა შეთანხმება.

„ყველა დეტალი გაანალიზდა და პროცესი დაიწყო“, - აღნიშნა სერგეენკომ. ამასთან, მინისტრს არ დაუკონკრეტებია გამოთქვეს თუ არა სურვილი პროგრამაში მონაწილეობის მისაღებად სხვა კომპანიებმაც.

სადაზღვევო კომპანიების ხარჯების ზრდა ჯანდაცვის მიღების ხელმისაწვდომობის ზრდამაც გამოიწვია. „არქიმედეს გლობალ ჯორჯიას“ დირექტორის – ნიკა რამიშვილის თქმით, თუ ადრე ადამიანს ხელოვნური ბარიერები აფერხებდა და ვერ მიდიოდა საცხოვრებელი ადგილიდან საკმაოდ დაშორებულ კლინიკაში, ახალი საავადმყოფოების აშენებამ ეს ბარიერები მოსპო. თუნდაც, სიღარიბის პროგრამით დაზღვეული ადამიანები, რომლებიც ტრანსპორტირებას და მგზავრობის საფასურის გადახდასაც კი ერიდებოდნენ, ახალი რეალობის გამო სულ უფრო ხშირად მიდიან კლინიკებში.

„2010 წელს საავადმყოფოები ფუნქციონირებდა მარტო დიდ ქალაქებში. თბილისი, ქუთაისი, ნაწილობრივ ბათუმში. მას შემდეგ, რაც სადაზღვევო ინდუსტრიამ 200 მილიონის ინვესტირება განახორციელა, ჯანდაცვაზე ხელმისაწვდომობა ძალიან გაიზარდა. 55 საავადმყოფო აშენდა რეგიონებში. მოსახლეობას გაუჩნდა საშუალება, რომ იქვე, რეგიონში მივიდეს და მომსახურება მიიღოს რეგიონშივე, რამაც გაზარდა უტილიზაცია ჯანდაცვის მიმართულებით, რაც თავისთავად აისახა ფასში“.

სადაზღვევო კომპანიებში ამბობენ, რომ სახელმწიფოსთან შეთანხმება არსებობდა, რომ 2013 წლის თებერვალში სახელმწიფო დაზღვევის პროგრამაში მონაწილეებისთვის სადაზღვევო პრემიის მოცულობა გადახედილიყო, თუმცა დღემდე ძველი ფასებით მიმდინარეობს პროგრამა და როგორც ირკვევა, სადაზღვევო კომპანიებისთვის ძალიან გართულდა მდგომარეობა.

„თბილისში დაზღვეულებს 15 ლარად ვემსახურებით, რეგიონებში არის 14 და 11 ლარი. ეს თანხა ცოტაა და ფასი უნდა გადახედილიყო, მაგრამ შეიცვალა მთავრობის სტრატეგია და არ მოხდა ფასების გადახედვა“, - ამბობს ნიკა რამიშვილი.

რაც შეეხება სადაზღვევო კომპანიებსა და კლინიკებს შორის დავალიანების წარმოქმნის მიზეზს, ერთ-ერთ ასეთ მიზეზად ნიკა რამიშვილი აღრიცხვიანობის სისტემის გაუმართავობასაც ასახელებს.

„ანგარიშგება ჰოსპიტლებიდან არ მოდის იმ ფორმატით, რა ფორმატითაც არის მოთხოვნილი და რაც ჩვენ გვაძლევს საშუალებას, რომ ადვილად მოვახდინოთ ზარალების და თითოეული შემთხვევის განხილვა და შემდგომ მისი ანაზღაურება.

ხშირ შემთხვევაში საქართველოს ჰოსპიტლების 80 პროცენტი არ არის მზად, რომ ეს ანგარიშგებების ფორმები მოიტანოს უნაკლოდ. ეს ნიშნავს, რომ ჩვენს თანამშრომლებს უწევთ ამათი გამოსწორება, რაც დროში იწელება. დროში გაწელვა ნიშნავს, რომ ანაზღაურება გადაიდო. ჩვენ ვართ ფინანსური ინსტიტუტი და ვალდებულება გვაქვს, რომ თითოეული თეთრი, რომელსაც ჩვენ ვრიცხავთ, იყოს დოკუმენტურად დადასტურებული. ჩვენ არ გვაქვს უფლება, ჰაერზე გადავრიცხოთ“, - განაცხადა რამიშვილმა „რუსთავი2“-ის ეთერში.

რას აცხადებდნენ სადაზღვევო კომპანიები, რაც დაზღვევის ახალი სქემა ამოქმედდა

მას შემდეგ, რაც ცნობილი გახდა, რომ სახელმწიფო საკუთარი ფონდით აპირებდა სახელმწიფოს მიერ დაზღვეული ადამიანების მომსახურებას, წინასწარი შეფასებები გამოჩნდა. საინფორმაციო პორტალმა „კომერსანტ.გე“-მ სადაზღვევო კომპანია „აისი ჯგუფის“ გენერალური დირექტორის – თენგიზ მეზურნიშვილის კომენტარი გაავრცელა, რომლის მიხედვითაც კომპანიამ შესაძლოა ჯანდაცვის მიმართულებაზე უარი თქვას. მოგვიანებით, მეზურნიშვილმა ეს კომენტარი უარყო და განაცხადა, რომ ჯერ საქმიანობას ჩვეულებრივ აგრძელებენ და ელოდებიან, რა პოლიტიკას აირჩევს სახელმწიფო სამედიცინო დაზღვევის სფეროში. მისი თქმით, „აისი ჯგუფის“ სამედიცინო დაზღვევის სეგმენტში სახელმწიფო დაზღვევის წილი 50%-ზე მეტია.

„ჯიპიაი ჰოლდინგის“ საზოგადოებასთან ურთიერთობის განყოფილების მოსაზრებით, საყოველთაო დაზღვევის ამოქმედებით პრობლემები უფრო მეტად იმ კომპანიებს შეექმნებათ, რომლებსაც ჯანდაცვის სეგმენტში სახელმწიფო სამედიცინო დაზღვევის დიდი წილი აქვთ.

„ჩვენ ვავითარებდით სხვა სადაზღვევო პროდუქტებსაც, „ჯიპიაი ჰოლდინგში“ სახელმწიფო სამედიცინო დაზღვევის წილი მხოლოდ 30%-ია. მთავარი საკითხი არის ის, რომ ჩვენ 2010-11 წლებში მნიშვნელოვანი პროექტი განვახორციელეთ და „ვენის სადაზღვევო ჯგუფთან“ ერთად რაიონებში 16 საავადმყოფო ავაშენეთ. პროექტში 30 მილიონი ლარის ინვესტიცია ჩაიდო.
შესაბამისად, ამ პროცესში ყველაზე მნიშვნელოვანი ინვესტორების ინტერესების დაცვაა. ისინი დაზარალებულები არ უნდა აღმოჩნდნენ. ბაზრის გაჯანსაღებისთვის მეორე ძალიან მნიშვნელოვანი საკითხია ის, რომ არ შეფერხდეს კორპორაციული დაზღვევა. გვინდა, ეს მიმართულება წინ წავიდეს“, - განაცხადა თინათინ სტამბოლიშვილმა.

„არქიმედეს გლობალ ჯორჯიას“ ხელმძღვანელის, ნიკა რამიშვილის თქმით, არსებულ პირობებთან ადაპტაცია მათთვის საკმაოდ რთული აღმოჩნდა, ვინაიდან სადაზღვევო კომპანიები ჰოსპიტალურ სექტორსაც ფლობენ და დღეს არაერთი პასუხგაუცემელი კითხვაა ამ თემის ირგვლივ.

„არ ვიცით, რა იქნება საყოველთაო დაზღვევის ამოქმედების შემდეგ, როგორი იქნება იგივე სადაზღვევო კომპანიების მფლობელობაში მყოფი ჰოსპიტლების როლი. ახლა ჯანდაცვის სამინისტროს წარმომადგენლებთან ერთად გავდივართ ამ საკითხს და ვცდილობთ პასუხების მიღებას“, - აცხადებდა რამიშვილი.

„ალდაგი ბისიაის“ საზოგადოებასთან ურთიერთობის ხელმძღვანელმა მაია ივჩენკომ კი აღნიშნა, რომ ამ საკითხზე კონსულტაციები გრძელდება ჯანდაცვის სამინისტროსთან და კომპანია პროდუქტების განვითარებას ჩვეული რეჟიმით აგრძელებს.

სადაზღვევო ასოციაციის ხელმძღვანელი, დევი ხეჩინაშვილი აცხადებდა, რომ სადაზღვევო სექტორი გაურკვევლობაშია. ეს საკითხი მხოლოდ კომპანიებს არ ეხება და გასათვალისწინებელია ინვესტორების და კომპანიებში ათასობით დასაქმებულის ინტერესებიც. მისი თქმით, 2008 წლიდან სადაზღვევო სექტორში დიდი ცვლილებები განხორციელდა, სადაზღვევო სერვისებზე ხელმისაწვდომობა 2 მილიონზე მეტ ადამიანს აქვს. ამასთანავე, შეიქმნა დიდი სამედიცინო ინფრასტრუქტურა.

„2012 წელს სადაზღვევო კომპანიებმა ყურადღება გაამახვილეს ინდივიდუალურ დაზღვევაზეც და ბოლო წელს დაახლოებით 60 000 დაეზღვია ინდივიდუალური პროგრამებით. კიდევ ერთხელ ვაცხადებ _ ჩვენ საყოველთაო დაზღვევამდე ფრთხილად უნდა მივიდეთ“, - აღნიშნა დევი ხეჩინაშვილმა.

როგორც წინასწარ არის გამოცხადებული, პირველი ივლისიდან სახელმწიფო პროგრამით დაზღვეულებს სახელმწიფო სადაზღვევო კომპანია მოემსახურება. ამ პერიოდიდან ამოქმედდება დაზღვევის საბაზისო პაკეტები, ანუ არსებულ პაკეტს გეგმური სერვისი დაემატება, როგორც ამბულატორიულ, ისე სტაციონალურ დონეზე. ასევე გაფართოვდება ამბულატორიული და დიაგნოსტიკური კვლევების ჩამონათვალი. დაფინანსდება ორსულობა-მშობიარობის ხარჯები. მიმდინარეობს მუშაობა მონაცემთა ბაზის დაზუსტებაზეც.

როგორც ცნობილია, სახელმწიფო სადაზღვევო კომპანია იქნება არამომგებიანი ინსტიტუტი, რომელიც თანხის ადმინისტრირებას, მიმწოდებლების (სამედიცინო პერსონალი, საავადმყოფოები) შერჩევასა და დაფინანსებას უზრუნველყოფს. მისი საბჭო დაკომპლექტდება სახელმწიფოს, პაციენტების, სამედიცინო პერსონალის, სადაზღვევო და არასამთავრობო ორგანიზაციების (მათ შორის, პროფკავშირების) წარმომადგენლებისაგან.

სახელმწიფო პროგრამით დაზღვეულების ეფექტიანი მომსახურება სახელმწიფო ფონდის მიერ, ექსპერტებს შეუძლებლად ეჩვენებათ. მათი ვარაუდით, კერძო კომპანიების ჩანაცვლებას სახელმწიფო თუნდაც იმიტომ ვერ შეძლებს, რომ კერძო კომპანიები ჯამში 10 000 ადამიანის პერსონალით მართავს დაზღვეულთა მომსახურებას. ამ რესურსის სახელმწიფო ფონდში მოძიება კი უკიდურესად რთული სავარაუდოა. იმავდროულად, სადაზღვევო კომპანიებისთვის შემოსავლის გარეშე დატოვება უმუშევრობის ზრდას იწვევს და კომპანიებს აიძულებს შემცირებისკენ. ზოგიერთი მათგანი კი, რომელიც ძირითადად სამედიცინო მომსახურებაზე იყო ორიენტირებული, სულაც გაკოტრების საფრთხის წინაშე დგებიან.

თემურ იობაშვილი