ააფ

ჟურნალის წინა ნომერში გამოქვეყნებული ამოცანა#119:

A და B ქალაქებიდან ერთმანეთის მიმართულებით ერთდროულად გამოვიდა ორი მგზავრი. ისინი ერთმანეთს შეხვდნენ 13:00 სთ-ზე და შემდეგ გააგრძელეს გზა. A ქალაქიდან გამოსული მგზავრი B ქალაქში ჩავიდა შეხვედრიდან ოთხნახევარი საათის შემდეგ, ხოლო B ქალაქიდან გამოსული მგზავრი A ქალაქში ჩავიდა შეხვედრიდან რვა საათის შემდეგ.
რომელ საათზე გამოვიდნენ მგზავრები A და B ქალაქებიდან?

ამოცანის პასუხი:

ვთქვათ, მგზავრებმა შეხვედრამდე იარეს t საათი. მაშინ ერთი მგზავრის სიჩქარის შეფარდება მეორე მგზავრის სიჩქარესთან იქნება 4,5/t (ერთი და იგივე მანძილის დაფარვას ერთმა მოანდომა 4,5 საათი, ხოლო მეორემ t საათი) ანალოგიურად, მათი სიჩქარეების შეფარდება ტოლი იქნება ასევე t/8-ის.

გვაქვს განტოლება:

4,5/t=t/8.

აქედან ვიღებთ:

txt=36, ანუ t=6.

თუკი მგზავრები ერთმანეთს შეხვდნენ 13:00 საათზე და შეხვედრამდე იარეს 6 საათი, მაშინ მათი გამოსვლის დრო ყოფილა დილის 7 საათი.

ამჯერად ჟურნალის მკითხველებიდან სწორი პასუხი პირველმა გვაცნობა და "ააფის" პრიზი (ზედიზედ მეორედ) დაიმსახურა ოთარ ტატალაშვილმა.

მორიგი ამოცანა #120:

მგზავრი გამოვიდა A წერტილიდან და გაიარა 1 მეტრი სამხრეთის მიმართულებით, 2 მეტრი – დასავლეთის მიმართულებით, 3 მეტრი – ჩრდილოეთის მიმართულებით, 4 მეტრი - აღმოსავლეთის მიმართულებით; შემდეგ ისევ 5 მეტრი – სამხრეთით, 6 მეტრი – დასავლეთით, 7 მეტრი ჩრდილოეთით, 8 მეტრი – აღმოსავლეთით და ა.შ. სულ მგზავრმა იარა 5 კმ და ამის შემდეგ დასასვენებლად ჩამოჯდა.

A წერტილიდან რა მანძილზე დაისვენა მგზავრმა? იგულისხმება, რომ მოძრაობა ხდება ბრტყელ ზედაპირზე.

პირველ მკითხველს, ვინც სწორად უპასუხებს ამ ამოცანას, გადაეცემა შესანიშნავი საჩუქარი - შპს "ააფ მენეჯმენტის" მიერ გამოცემული ერთ-ერთი წიგნი:

1) ფრანგი მწერლის, ნობელის პრემიის ლაურეატის ანდრე ჟიდის რომანი "ვიწრო კარიბჭე";

2) ო. ჰენრის ნოველების კრებული "ზაფხულის შუადღის სიზმარი";

3) ფრანგი მწერლის, რეიმონ კენოს რომანი "ქალი არ უნდა გაანებივრო".

გამარჯვებულის ვინაობა გამოქვეყნდება!

დაგვირეკეთ ტელეფონზე: (895) 59 02-75.

გისურვებთ წარმატებებს!

ფრიდონ ალშიბაია