ააფ

ჟურნალის წინა ნომერში გამოქვეყნებული ამოცანა #124:

კუნძულზე ცხოვრობს 96 ადამიანი (კუნძულის მმართველების გარდა). მმართველობამ გადაწყვიტა გაატაროს ხუთი რეფორმა. ცნობილია, რომ ყოველი რეფორმით უკმაყოფილოა ზუსტად ადამიანების ნახევარი და ყოველი ადამიანი გამოდის მიტინგზე, თუ ის არ ეთანხმება რეფორმების ნახევარზე მეტს. მომიტინგეთა რა მაქსიმალურ რაოდენობას უნდა ელოდოს ხელისუფლება გატარებული რეფორმების შემდეგ?

ამოცანის პასუხი:

პირობითად, ყველა ჩატარებულ რეფორმაზე თითოეულ უკმაყოფილო მოქალაქეს მივცეთ ერთი კანფეტი. რადგანაც თითოეული რეფორმას ყავს ზუსტად 48 მოწინააღმდეგე, სულ დარიგდება 48X5=240 კანფეტი. ცხადია, ყველა მომიტინგეს უნდა ჰქონდეს მინიმუმ სამი კანფეტი, ამიტომ მომიტინგეთა მაქსიმალური რიცხვია 80.

ახლა მოვიყვანოთ მაგალითი იმისა, თუ როგორ შეიძლება მიტინგზე მოვიდეს 80 უკმაყოფილო მოქალაქე.

კუნძულის მაცხოვრებლებიდან ავირჩიოთ 80 ადამიანი და გავყოთ ისინი 5 თანაბარ ჯგუფად, თითო ჯგუფში 16 კაცი.

დავუშვათ:

1-ლი რეფორმით უკმაყოფილოა - I, II, III ჯგუფი;
მე-2 რეფორმით უკმაყოფილოა - II, III, IV ჯგუფი;
მე-3 რეფორმით უკმაყოფილოა - III, IV, V ჯგუფი;
მე-4 რეფორმით უკმაყოფილოა - IV, V, I ჯგუფი;
მე-5 რეფორმით უკმაყოფილოა - V, I, II ჯგუფი.

მოყვანილი მაგალითიდან ჩანს, რომ ყოველი რეფორმის მოწინააღმდეგეა 16X3=48 მცხოვრები და მიტინგზე გამოვა არჩეული 80 მცხოვრები.

ამჯერად ჟურნალის მკითხველებიდან სწორი პასუხი პირველმა გვაცნობა და "ააფ"-ის პრიზი დაიმსახურა ლევან გორგილაძემ.

მორიგი ამოცანა #125:

არითმეტიკულ გამოსახულებაში 101-102=1, გადაადგილეთ ერთი ციფრი ისე, რომ ეს გამოსახულება გახდეს ჭეშმარიტი.

პირველ მკითხველს, ვინც სწორად უპასუხებს ამ ამოცანას, გადაეცემა შესანიშნავი საჩუქარი - შპს "ააფ მენეჯმენტის" მიერ გამოცემული ერთ-ერთი წიგნი:
1) ფრანგი მწერლის, ნობელის პრემიის ლაურეატის ანდრე ჟიდის რომანი "ვიწრო კარიბჭე";
2) ო. ჰენრის ნოველების კრებული "ზაფხულის შუადღის სიზმარი";
3) ფრანგი მწერლის, რეიმონ კენოს რომანი "ქალი არ უნდა გაანებივრო".

გამარჯვებულის ვინაობა გამოქვეყნდება! დაგვირეკეთ ტელეფონზე: (95) 59-02-75 (მობ.) ან გამოგვიგზავნეთ პასუხი ელ-ფოსტით: palshibaia@tsodnisa.ge.
გისურვებთ წარმატებებს!