სახელმწიფოს მიერ შარშან ჩადებული ნაღმი წელს აფეთქდა
სოციალურად დაუცველმა მოსახლეობამ რომ სათანადო სამედიცინო მომსახურება მიიღოს, სახელმწიფო ბოლო წლებში ასეულობით მილიონ ლარს ხარჯავს. ეს ფული სადაზღვევო კომპანიებთან მიდის და სწორედ ეს კომპანიები უწევენ კოორდინაციას დაზღვეულებს და სამედიცინო დაწესებულებებს. ბოლო წლებში დაზღვეულთა რაოდენობა საკმაოდ მკვეთრად იზრდება, თუმცა, ისიც საყურადღებოა, რომ დღევანდელი მონაცემებითაც, სადაზღვევო კომპანიების მიერ მოზიდულ ჯამურ პრემიაში უდიდესი წილი სახელმწიფო ბიუჯეტიდან გამოყოფილ ფულს უჭირავს. თუმცა, რა უფრო მნიშვნელოვანია სახელმწიფოსთვის - სადაზღვევო ბიზნესის განვითარება თუ სოციალურად დაუცველი მოსახლეობის სამედიცინო მომსახურების ვინმესთვის გადაბარება - ჯერ კიდევ დასაზუსტებელია.
ფაქტია, რომ სახელმწიფო ბოლო წლებში ბიუჯეტიდან სოციალური პროგრამების დასაფინანსებლად ასეულობით მილიონს ხარჯავს, სამედიცინო დაზღვევის ფარგლებში კერძო სადაზღვევო კომპანიებს მომსახურების მაღალ ხარისხს სთხოვს და შემდეგ, უკმაყოფილო ხელისუფლება სადაზღვევო კომპანიებს მუქარით თითს უქნევს. სადაზღვევო კომპანიების მიმართ გასულ თვეში სერიოზული პრეტენზიები გაისმა. მთავარი მიზეზი - სახელმწიფოს გამოყოფილი ფულის სადაზღვევო კომპანიების მიერ მითვისება და დაზღვეული მოსახლეობისთვის სათანადო სამედიცინო მომსახურების არ გაწევაა.
ცხრილი №1. 2008-2010 წლების სტატისტიკური მონაცემები
საქართველოს პრეზიდენტი, რომელიც უამრავ სხვა სფეროზე ამახვილებს ხოლმე ყურადღებას, ამჟამად დაზღვევასაც შეეხო. სატელევიზიო პროექტში „პრეზიდენტი პასუხობს ხალხს“ მიხეილ სააკაშვილმა სადაზღვევო კომპანიებს მიმართა და განაცხადა, რომ მათ მოგების დაუშვებლად მაღალი მარჟა აქვთ. პრეზიდენტმა ისიც განაცხადა, რომ სადაზღვევო კომპანიებისთვის სახელმწიფომ რეგულირების მექანიზმები უნდა შეიმუშავოს.
პრეზიდენტის ამ გამოსვლის შემდეგ სადაზღვევო კომპანიებს უკვე საქართველოს კონტროლის პალატამ შეუტია და რამდენიმე დღე სადაზღვევო კომპანიები საინფორმაციო გამოშვებებში დღის მთავარ თემად რჩებოდნენ.
რას ედავება კონტროლის პალატა სადაზღვევო კომპანიებს
საქართველოს კონტროლის პალატის ვებ-გვერდზე მითითებულია, რომ სადაზღვევო კომპანიებმა გამოყოფილი თანხის დიდი ნაწილი არ გახარჯეს და დაზღვეულები სამედიცინო მომსახურების გარეშე დატოვეს. უფრო ზუსტად კი, აი რა წერია კონტროლის პალატის განცხადებაში:
"საქართველოს კონტროლის პალატა 2010 წლიდან იკვლევს ჯანმრთელობის დაზღვევის სახელმწიფო პროგრამის მართვის კანონიერებას. აღნიშნული პროგრამის ფარგლებში მოსახლეობის დროული და ხარისხიანი სამედიცინო მომსახურებით უზრუნველყოფის მიზნით 2008-2010 წლებში სახელმწიფო ბიუჯეტიდან 284 მლნ ლარი დაიხარჯა.
კონტროლის პალატის წინასწარი აუდიტით გამოვლინდა არსებითი რისკები და ნაკლოვანებები:
• არ ხორციელდებოდა სადაზღვევო კომპანიების მიერ დაზღვევის პირობების შესრულების სათანადო მონიტორინგი;
• სადაზღვევო კომპანიებს უმწეო მოქალაქეებთან არ აქვთ გაფორმებული სადაზღვევო ხელშეკრულებები;
• მოქალაქეები არ ფლობენ სადაზღვევო პოლისებს და არ არიან ინფორმირებულნი დაზღვევის პირობების შესახებ;
• სადაზღვევო კომპანიები უმწეო მოქალაქეებს ხელოვნურად უზღუდავენ სამედიცინო მომსახურების ხელმისაწვდომობას უსაფუძვლოდ გაჭიანურებული პროცედურებით;
• სადაზღვევო კომპანიები მოქალაქეებს მკურნალობის დაფინანსებაზე დაუსაბუთებლად უცხადებენ უარს, სთავაზობენ არასტანდარტულ და არასასურველ სამედიცინო დაწესებულებებს.
აღნიშნული ნაკლოვანებების შედეგად, სადაზღვევო კომპანიებმა მოსახლეობის სამედიცინო მომსახურებაზე დახარჯეს გამოყოფილი თანხის მხოლოდ 40%, რომელიც მოხმარდა დაზღვეულთა მხოლოდ 21%-ს".
საქართველოს კონტროლის პალატის წინასწარი აუდიტის მონაცემების მიხედვით, რომელიც 2 თებერვალს გავრცელდა და ტელევიზიებით აქტიურად გაშუქდა, სადაზღვევო კომპანიებს სახელმწიფოს ხარჯზე ზემაღალი მოგების მიღებაში ადანაშაულებენ.
ცხრილი №2. 2008-2010 წლების სტატისტიკური მონაცემები
„მკაცრი სახელმწიფო რეგულირების არ არსებობის და სადაზღვევო კომპანიების არაკეთილსინდისიერი ქმედებების გამო, ბოლო სამი წლის მანძილზე ჯანმრთელობის დაზღვევის სახელმწიფო პროგრამიდან სადაზღვევო კომპანიების მოგების მარჟამ 60%-ს გადააჭარბა“, - განაცხადეს საქართველოს კონტროლის პალატაში.
კონტროლის პალატის განცხადებითვე, სახელმწიფოს დაფინანსებით 2008-2010 წლებში განხორციელებული დაზღვევის პროგრამის აუდიტის წინასწარი მონაცემები „საგანგაშოა“.
ამავე განცხადების თანახმად, 2008-2010 წლებში სახელმწიფო ბიუჯეტიდან 284 მილიონი ლარი გამოეყო 10 სადაზღვევო კომპანიას – დაახლოებით 808 000 ადამიანის ჯანმრთელობის დაზღვევისთვის; კონტროლის პალატის თქმით, მოსახლეობის მომსახურებაზე აღნიშნული თანხის მხოლოდ 40%-მდე დახარჯეს, რომელიც მოხმარდა დაზღვეულთა მხოლოდ მეხუთედს.
ლევან ბეჟაშვილი, კონტროლის პალატის თავმჯდომარე:
„ჩვენ ვფიქრობთ, რომ სადაზღვევო კომპანიები სწორედ იმიტომ არიან შექმნილნი, რომ აკეთონ ბიზნესი, მოემსახურონ მოსახლეობას და შესაბამისად მიიღონ მოგება. მაგრამ, აქ საუბარია, რომ ეს მოგება უნდა იყოს გონივრული და ეს მოგება უნდა მომდინარეობდეს მათი კეთილსინდისიერი საქმიანობიდან. 2008-2010 წლებში სახელმწიფომ ასობით მილიონი ლარი გამოყო განსაკუთრებით უმწეო კატეგორიაში მყოფი მოსახლეობისათვის და ფაქტია, რომ სახელმწიფო პროგრამამ ის მიზნები, ის ამოცანები ვერ შეასრულა. მოსახლეობის 80% დარჩა შესაბამისი სადაზღვევო მომსახურების გარეშე. შესაბამისად, კომპანიებმა მიიღეს დაახლოებით 60%-ზე მეტი მოგება“.
კონტროლის პალატის მიერ დასახელებულ პერიოდში ჯანდაცვის მინისტრი ალექსანდრე კვიტაშვილი იყო, რომელიც ამჟამად თბილისის ივანე ჯავახიშვილის სახელობის სახელმწიფო უნივერსიტეტის რექტორია. საინფორმაციო სააგენტოებთან ალექსანდრე კვიტაშვილი აცხადებს, რომ სადაზღვევო კომპანიების ირგვლივ შექმნილ სიტუაციაში იგი არაფერ შუაშია.
"მე რა შუაში ვარ?! არის სადაზღვევო კომპანია და ეროვნულ ბანკში სადაზღვევო საქმიანობაზე ზედამხედველობის სამსახური, რომელიც ამ ყველაფერს აკონტროლებს", - განაცხადა კვიტაშვილმა.
კონტროლის პალატის წარმომადგენელი გიორგი ალასანია კი აცხადებს, რომ სახელმწიფო სამედიცინო დაზღვევის კანონიერად მართვაზე პასუხისმგებლობა ჯანდაცვის სამინისტროს ეკისრება. ამავე დროს, დააზუსტა, თუ რა თანხა დარჩათ ხელუხლებელი სადაზღვევო კომპანიებს.
"2008-2010 წლებში ბიუჯეტიდან უმწეოთა სახელმწიფო სამედიცინო დაზღვევაზე გამოყოფილი 284 მლნ ლარიდან უმწეოთა მომსახურების მიზნებს მოხმარდა მხოლოდ 40% ანუ 114 მლნ ლარი. დარჩენილი 170 მლნ ლარი იქცა სადაზღვევო კომპანიების შემოსავლად, იმის ხარჯზე, რომ მათ არ უზრუნველყვეს ყველა ბენეფიციარი, ვინც დახმარებას საჭიროებდა. გაწეული 40%-იანი ხარჯი მოხმარდა მხოლოდ ბენეფიციართა 20%-ს, დაახლოებით 800 000 მოქალაქიდან - 171 000 მოქალაქეს", - განმარტა ალასანიამ.
სადაზღვევო კომპანიები ბრალდებას არ ეთანხმებიან
სადაზღვევო კომპანიები კონტროლის პალატის შუალედურ დასკვნას არ დაეთანხმნენ.
„კონტროლის პალატის შუალედურ დასკვნას არ ვეთანხმებით. იმედი გვაქვს, მათი საბოლოო დასკვნა რეალურ მონაცემებთან იქნება შესაბამისობაში. ჩვენგან ეროვნულ ბანკს ყოველკვარტალურად ეგზავნება ფინანსური და სტატისტიკური ანგარიშგება, რომელიც აბსოლუტურად არ შეესაბამება ამ მონაცემს“, - განაცხადა კომპანია "აისი ჯგუფის" საზოგადოებასთან ურთიერთობის განყოფილების უფროსმა ირინა შენგელაიამ.
კომპანია „იმედი L“-ის გენერალური დირექტორის მოადგილის, ლაშა ნიკოლაძის განცხადებით, კონტროლის პალატის მიერ გამქვეყნებული მონაცემები სრულიად განსხვავდება რეალური წმინდა მოგებისგან.
„კონტროლის პალატის მიერ გამოქვეყნებული ინფორმაცია არ იძლევა კონკრეტული დასკვნების გაკეთების საფუძველს. კერძოდ, მოგების მარჟა აბსოლუტურად განსხვავდება რეალური წმინდა მოგებისგან, რომელიც ჩვენს კომპანიას ამ სახელმწიფო პროგრამების განხორციელებიდან დარჩა. არანაირ სუპერმოგებებზე ლაპარაკი არ შეიძლება“, - განაცხადა ლაშა ნიკოლაძემ.
კომპანია „ჯიპიაი ჰოლდინგის“ გენერალურ დირექტორს, გიორგი კვირიკაძეს მიაჩნია, რომ კონტროლის პალატის შუალედური დასკვნის გამოქვეყნება ჩრდილს აყენებს ერთ-ერთ ყველაზე წარმატებულ სადაზღვევო რეფორმას.
„ეს არის წინასწარი შუალედური დასკვნა და მასზე კომენტარის გაკეთება ძნელია. თუმცა, ეს ყველაფერი იმდენად ნეგატიურად იყო წარდგენილი, რომ საქართველოში ერთ-ერთ ყველაზე წარმატებულ რეფორმას ჩრდილს აყენებს“, - აღნიშნა კვირიკაძემ.
მისივე თქმით, 2007-2010 წლებში „ჯიპიაი ჰოლდინგის“ წმინდა მოგება სახელმწიფო სამედიცინო დაზღვევის პროგრამის ფარგლებში მხოლოდ 6,8%-ია.
გიორგი კვირიკაძე:
„კონტროლის პალატა საუბრობს მოგების მარჟაზე, რასაც შეიძლება მეტ-ნაკლებად დავეთანხმოთ, მაგრამ არ საუბრობენ, რომ სადაზღვევო კომპანიებს თავისი ხარჯებიდან, სტრუქტურის თავისებურებიდან გამომდინარე გააჩნია სხვა ხარჯებიც. ეს არის ადმინისტრაციული ხარჯებიც, გადასახადებიც, რაზეც არაფერს ამბობს კონტროლის პალატა.
ჩვენს აუდიტს ახორციელებს მსოფლიოში ცნობილი კომპანია და ძნელია მათ კომპეტენციაში ეჭვის შეტანა. ჩვენ 2007-2010 წლის ანგარიში წარვადგინეთ და მოგებამ შეადგინა სულ 6,8%. ეს არის დაახლოებით 6 მილიონ ლარამდე. მაგრამ არ უნდა დაგვავიწყდეს, რომ სადაზღვევო კომპანიებს და მათ შორის ჩვენს კომპანიას აქვს 25 მილიონი ლარის ინვესტირების ვალდებულება წელსვე, ჰოსპიტალების მშენებლობაზე.
2011 წლიდან ჩვენი დაზღვეულები ისარგებლებენ უკვე ახალი საავადმყოფოების სერვისით. ამისათვის ჩვენი კომპანია ჩადებს 25 მილიონ ლარს. წელსვე უნდა დამთავრდეს მშენებლობა. მთლიანად, სადაზღვევო კომპანიები დაახლოებით 120 მილიონამდე ლარის ინვესტირებას მოახდენენ წელსვე.
ჩვენს დამფუძნებელს, ვენის სადაზღვევო ჯგუფს მოუწევს დაახლოებით 10-15 მილიონი თანხის გამოყოფა, რათა ჩვენ შევძლოთ 25 მილიონის ინვესტირება საავადმყოფოების მშენებლობაში. თუმცა, ეს საავადმყოფოები ჩვენი საკუთრება იქნება. ყაზბეგში და სხვა პერიფერიულ ტერიტორიებზე სადაზღვევო კომპანიებს დამატებით თანხების გამოყოფა მოუწევს საავადმყოფოების შესანახად. ყველა იქნება დოტაციური. ეს ვალდებულება შემდეგ წლებშიც გრძელდება. 7 წლის განმავლობაში ჩვენ ვალდებულები ვართ შევინახოთ ეს საავადმყოფოები".
კონტროლის პალატის წინასწარი დასკვნის შედეგები
მას შემდეგ, რაც გაირკვა, რომ დაზღვეულები ვერ ღებულობდნენ სამედიცინო მომსახურებას, სახელმწიფოს კი ეს ფული გადახდილი ჰქონდა, დაიწყო დამნაშავის ძიება. მართალია, შუალედური დასკვნა შეიძლება საბოლოო დასკვნისგან განსხვავებული იყოს, მაგრამ კონტროლის პალატის მიერ გაკეთებული განცხადებების შემდეგ უკვე სამართალდამცავებიც გააქტიურდნენ.
ფინანსთა სამინისტროს საგამოძიებო დეპარტამენტის თანამშრომლებმა ჯანდაცვის სამინისტროს მომსახურების სააგენტოს მაღალჩინოსნები და სადაზღვევო კომპანიების წარმომადგენლები დააკავეს. მათ ბრალად ედებათ სახელმწიფო დაზღვევისთვის გამოყოფილი საბიუჯეტო თანხების მითვისება. დაკავებულია 16 ადამიანი, საიდანაც შვიდი მომსახურების სააგენტოს თანამშრომელია.
გამოძიების ინფორმაციით, დაკავებულნი არიან: სოციალური მომსახურების სააგენტოს დირექტორის მოადგილე იოსებ ლობჟანიძე, სოციალური პროგრამების დეპარტამენტის უფროსი გელა ჩივიაშვილი, სოციალური პროგრამების დეპარტამენტის უფროსის მოადგილე ანა წიქარიშვილი, სოციალური პროგრამების სამმართველოს უფროსი მამუკა შალამბერიძე, სოციალური მომსახურების სააგენტოს ლაგოდეხის სამსახურის უფროსი თეიმურაზ გოგოლაძე, ამავე სამსახურის სოციალური აგენტები - მამუკა ბოკერია და ალექსანდრე შავლაყაძე, სადაზღვევო კომპანია „ალფას“ სახელმწიფო პროგრამების შესყიდვებისა და მართვის სამსახურის უფროსი გიორგი ამბროლიანი, სახელმწიფო პროგრამების მენეჯერი გივი წულეისკირი და ჰოსპიტალურ კლინიკებთან ურთიერთობისა და მონიტორინგის სამსახურის უფროსი ილია ხომერიკი, სადაზღვევო კომპანია „არქიმედეს გლობალ ჯორჯიას“ პროექტების განვითარების მენეჯერი რატი ნოდია, სადაზღვევო კომპანია „ალდაგი ბისიაის“ საცალო გაყიდვების განყოფილების სახელმწიფო პროგრამების განყოფილების უფროსი ივანე კახიძე, სადაზღვევო კომპანია „იმედი L"-ის აღმასრულებელი დირექტორის მოადგილე ნიკოლოზ ჩიხლაძე, სადაზღვევო კომპანია „ირაოს“ რეგიონალური მართვის დეპარტამენტის უფროსი ივანე მელიქიშვილი, სადაზღვევო კომპანია „აისი ჯგუფის“ სიღარიბის ზღვარს ქვემოთ მყოფი მოსახლეობის ყოფილი სამედიცინო მენეჯერი მაია ცანავა და სადაზღვევო კომპანია „ჯიპიაი ჰოლდინგის“ სახელმწიფო სოციალური პროგრამების მენეჯერი თეიმურაზ ჩიხლაძე.
მამუკა გილიგაშვილი, ფინანსთა სამინისტროს საგამოძიებო დეპარტამენტის უფროსის მოადგილე:
"გამოძიებით დადგენილია, რომ აღნიშნულმა პირებმა, ყალბი დოკუმენტების დამზადებითა და გამოყენებით, სადაზღვევო კომპანიების მიერ ჯანმრთელობის დაზღვევის სახელმწიფო პროგრამის ფარგლებში აღებული ვალდებულებების უგულებელყოფით და მატერიალური გამორჩენის მიღების მიზნით, არ დაარიგეს სოციალურად დაუცველი პირებისთვის განკუთვნილი სადაზღვევო პოლისები და შესაბამისად, თავი აარიდეს გასაწევი სამედიცინო მომსახურების ხარჯებს, რის შედეგადაც, მიითვისეს 5 700 000 ლარზე მეტი სადაზღვევო პროგრამისათვის გამოყოფილი სახელმწიფო თანხა".
წინასწარი გამოძიება საქართველოს სისხლის სამართლის კოდექსის 182-ე, 332-ე და 372-ე მუხლებით მიმდინარეობს. ტელევიზიებით გავრცელდა დაკავებულთა აღიარებითი ჩვენებები და ფარული ვიდეოჩანაწერები.
სოციალურად დაუცველი ადამიანები ჟურნალისტებთან საუბარში ყვებიან, რომ მათ სადაზღვევო პოლისები 10 თვის დაგვიანებით მიიღეს, როდესაც დაზღვევას უკვე ვადა გასდიოდა.
თბილისსა და რეგიონებში დაზღვეულები ერთსა და იმავე სქემაზე საუბრობენ. ისინი აცხადებენ, რომ, როდესაც კომპანიებს მიმართეს, მათ განუმარტეს, რომ პოლისები იგვიანებს და სადაზღვევო ბარათებს უახლოეს მომავალში დაურიგებენ, თუმცა პოლისები მათ 10 თვის შემდეგ გადასცეს.
ვინ არის დამნაშავე სადაზღვევო სკანდალში?
როდესაც საქმე სამედიცინო დაზღვევას ეხება, სადაზღვევო კომპანიები შეიძლება ითქვას, "ჩამოეკიდნენ" სახელმწიფოს პროგრამებს. დღემდე ვერ მოხერხდა ხალხის მასობრივად დაინტერესება დაზღვევით და ამიტომ, სახელმწიფოს მიერ გარანტირებულად დაფარული ჯამური პრემიები სადაზღვევო კომპანიებისთვის სასურველი ლუკმაა. დაზღვევის არსი და სადაზღვევო კომპანიის მომგებიანობა დაზღვეულთა რაოდენობაზეა დამოკიდებული. როდესაც საქმე სამედიცინო დაზღვევას ეხება, სადაზღვევო კომპანიები მაქსიმალურად ართულებენ ინდივიდუალურ დაზღვევას. კორპორატიული დაზღვევის შემთხვევაში, როდესაც დაზღვეულს გარკვეულ ფასად გარკვეულ დაფარვებს სთავაზობენ, ინდივიდუალური დაზღვევის შემთხვევაში იგივე ჯამური პრემიით დაზღვეული ადამიანი გაცილებით უარეს დაფარვებს მიიღებს. ამავე დროს, არის დიდი შანსი, რომ ინდივიდუალურად საერთოდ არც დააზღვიონ. სწორედ ამიტომ სახელმწიფო პროგრამები სადაზღვევო კომპანიებს შორის კონკურენციის მიზეზი გახდა. მაგრამ სახელმწიფომ ბოლო წლებში რამდენჯერმე შეცვალა თამაშის წესები და საგამოძიებო სამსახურების განცხა-დებებს თუ დავეყრდნობით, სახელმწიფომ სადაზღვევო ბაზარზე ჯანსაღი კონკურენციის ნაცვლად გარიგებები, სახელმწიფო თანხის მითვისება და თაღლითობა მიიღო.
2007 წელს სახელმწიფო პროგრამებით დაზღვევის საფასურად სახელმწიფომ ერთ დაზღვეულზე 7.94 ლარი განსაზღვრა. ამ პირობებში კომპანიებმა წელი წმინდა ზარალით დაასრულეს და დღის წესრიგში დადგა ვაუჩერის ფასის გადახედვის თემა. 2008 წელს ეტაპობრივად შემოვიდა 11.01-ლარიანი ვაუჩერი. ფასი მიმზიდველი აღმოჩნდა და კომპანიებს შორის რეალური კონკურენცია დაიწყო. 2009 წელს კიდევ ერთხელ მოხდა ფასის ზრდა და ვაუჩერის ღირებულებამ 15 ლარამდე მოიმატა. ახალი ფასით კომპანიები ისე მოიხიბლნენ, რომ ვაუჩერის მფლობელების მოსაზიდად თუ გადასაბირებლად უამრავი მეთოდი გამოიყენეს.
თუმცა, მთავრობამ 2010 წლის გაზაფხულზე თამაშის წესები კვლავ უცნაურად შეცვალა. ვაუჩერის ღირებულება შეამცირა 15-დან 11 ლარამდე; კომპანიებს სახელმწიფო პროგრამაში მონაწილეობის პირობად დაუყენა რაიონული საავადმყოფოების მშენებლობა; გაზარდა სადაზღვევო მომსახურების მოცულობა (დაამატა წამლები).
ამავდროულად, 2010 წლის გაზაფხულზევე გამართულ ტენდერში ჯანდაცვის სამინისტრომ სადაზღვევო კომპანიები ერთმანეთთან გარიგებაში დაადანაშაულა და ტენდერის შედეგებიც გაუქმებულად გამოაცხადა. სწორედ მაშინ მოხდა თითო დაზღვეულზე გამოყოფილი სადაზღვევო პრემიის კიდევ უფრო შემცირება. სადაზღვევო კომპანიებმა, ტენდერის ჩაშლილად გამოცხადების მერე ბევრი ამტკიცეს, ჩვენ არც გარიგებაში შევსულვართ ერთმანეთთან და არც რაიმე დაგვიშავებიაო, მაგრამ არაფერი გამოუვიდათ.
საბოლოოდ სახელმწიფომ თითო დაზღვეულზე განსაზღვრული თანხა მაინც შეამცირა და ხელახალი ტენდერის ჩატარების შემდეგ სადაზღვევო კომპანიებს საავადმყოფოების მშენებლობაც დაავალა. ვარაუდი, რომელიც მაშინვე გაჩნდა, რომ შემცირებულ ფასად იგივე სამედიცინო მომსახურებას დაზღვეულები ვეღარ მიიღებდნენ და სადაზღვევოებიც მაქსიმალურად შეეცდებოდნენ თანხების დაზოგვას - წელს გამართლდა. დამნაშავეებიც დაიჭირეს, მაგრამ საეჭვოა, მხოლოდ დაკავებულებს გაებედათ მილიონობით ლარის მითვისების სქემაში მონაწილეობა. ჯერ კიდევ შარშან, სახელმწიფოს მიერ ტენდერის ჩაშლილად გამოცხადება, შემდეგ კი სადაზღვევოებისთვის შემცირებულ ჯამურ პრემიაზე, თან, ახალი საავადმყოფოების მშენებლობაზე დათანხმება წინასწარ კითხვებს აჩენდა. მთავრობას აქამდე არ უღიარებია (და ალბათ არც აღიარებს), რომ ამ ყველაფრის მიზეზი თავად გახდა.
სადაზღვევო კომპანიები კონტროლის პალატის გააქტიურების შემდეგ ჩუმად არიან. ერთი რაც იყო, ის გააპროტესტეს - არ ვეთანხმებით წინასწარ დასკვნას, საბოლოო პოზიციას საბოლოო დასკვნის გამოქვეყნების შემდეგ დავაფიქსირებთო.
დაზღვევის ასოციაციის ხელმძღვანელი დევი ხეჩინაშვილი აცხადებს, რომ სადაზღვევო კომპანიების მიერ მიღებული მოგება და მოგებაში მარჟის პროცენტულობა დაზღვევის შედეგების წლიური მაჩვენებლების გამოქვეყნების შემდეგ გაირკვევა. მანამდე კი მთავრობა დამნაშავეებს ეძებს, სადაზღვევო კომპანიები სდუმან, სოციალურად დაუცველი ხალხი კი ისევ სამედიცინო მომსახურების გარეშე რჩება.
თემურ იობაშვილი
